狗狗飲食系列 - 乾糧

絕大部分既家長。都係餵緊乾糧既。
無他，價錢平，‘營養齊全‘，容易買到，儲存容易，餵食方便～
第一集當然係要研討下揀乾糧有咩要注意啦！

首先，大家要留意，係狗糧包裝上面，用例如Premium, Allergen-free, High Performance, 之類既字眼，係完全無規管架！
每隻狗狗既致敏源都唔一樣，根本無可能話Allergen-free
而Premium之類既字眼更加係講咗等於無講！
者係話，呢D字眼只係完全無意義既宣傳字句，千祈唔好俾呢D字呃到呀！

咁到底睇咩先岩？
相信大家都想知，餵緊D咩俾毛孩食架！
咁就要學識睇✅成分列同✅營養標籤啦！
大家先要理解
人類既能量來源主要係碳水化合物
而狗狗既就唔一樣，佢地既能量來源係蛋白質！
呢樣係必須要謹記既！
‼️雖然五穀對狗狗無害，但狗狗無必要食飯架！

第一樣要睇既係成分列
成分列既內容，係根據成分既重量，由重到輕排列既，
不過重量係用脫水加工前既重量計算架！
狗狗既主食係肉類，排第一既成分當然應該係肉類啦！
但咁就夠好？
乾糧最常見既頭兩種材料：雞肉同穀物
試幻想，雞肉同米粒各200g，抽乾水分之後，又變成點？
之後米粒煮成飯，加上燼餘既雞肉乾。。。
狗狗到底係食肉食飽既，定係俾穀類填飽架呢？
肉類偷工減料，仲有咩影響？

大家可能會睇營養標籤，睇蛋白質含量。
但其實蛋白質都有好多種。
最簡單有動物蛋白質同植物蛋白質之分。
而對狗狗黎講，動物蛋白質會比較理想，更加容易吸收。

如果肉類唔夠，但蛋白質又好充足代表咩？
就係缺少既蛋白質，用豆類，蘆筍，菠菜之類，高蛋白質既素食補足。
雖然對毛孩無害，但提供既營養就大打折扣啦！
‼️一般黎講，肉類至少要佔成分列既頭兩至三位先算合格架！
快d去睇下狗狗而家食緊既成份到底係d咩啦！

下集我地繼續睇下營養標籤啦！
⭕️如果狗狗有特殊需要，例如腎病既狗狗，要求少蛋白質既食物，對乾糧既要求都會唔同哦

(February 17, 2017)