80後會計師難忍狂OT 創鮮食磚返工見「仔仔」

Healthy Little Paws 品牌創立

近日四大會計師行（Big4）之一的畢馬威（KPMG），因懷疑有部門會就員工遲到每次罰款一百元而鬧得滿城風雨之時；同是會計師出身，於澳洲生活過八年的阮詠珊(Stella)雖未面對過如此刻薄的條件，但也深明香港的打工仔難撈。「香港嘅工作氣氛係要準時上班，但遲收工、超時工作卻好應份，就算已經完成晒手頭上嘅嘢，都唔好意思準時走。」她在去年養了一隻魔天使狗仔後，更感到生命中有很多事情是大於工作。「唔希望佢一日十幾個鐘一個唔知做咩，所以開始諗可唔可以有份工係俾到自己自由度去對住佢。」她因此毅然辭下正職，創立了Healthy Little Paws 腳板仔鮮食主義，把因一手一腳照顧牠而研製而成的鮮食磚分享出去。產品的受歡迎程度終令家中廚房不勝負荷，促使她於今年建立起工場，真正完成了帶著「愛兒」上下班的小小夢想。

想同「愛兒」糖痴豆

「記得有次，我返工時睇屋企個cam，見到MorBB佢反白眼又郁都唔郁，嚇到我立即雲端開電腦整啲聲出嚟，睇下佢有無反應。」廿八歲的Stella繪影繪聲地說起，此雖然是虛驚一場，但令她立下心腸，誓要花更多時間照顧及陪伴MorBB。訪問期間，只見Stella不時忙碌地處理食材，不時又難敵「愛兒」苦苦哀求而一手抱起牠，連中午食飯也帶牠到設露天座位的食肆一起用餐，畫面比情侶更痴纏。「之前一直唔敢太用力宣傳公司，因屋企個廚房已經迫爆咗，到後嚟真係頂唔順，終於上左工廠，可以大批咁整，現時一個月可以生產到六千至八千磚。」說是主人，不少港人愛鍚毛孩的程度其實直迫「家長」，應接不暇的訂單令Stella勇敢擺脫自家小型製作的形式，量產鮮食磚。

而自製鮮食的念頭，正是出至「愛兒」心切。「啱啱帶佢返嚟，發現佢有淚痕、口臭同埋消化不良等問題，好擔心。」其於是在飲食著手，發現狗仔情況在不吃乾糧，改吃她親手下廚的食物後有所改善，她更找上當營養師的妹妹阮詠雯 (Mandy)給予進一步意見，擔當其產品顧問。「鮮食同乾糧嘅分別，就好似人類係食罐頭定係新鮮煮出來嚟嘅食物，罐頭可能會加防腐劑、添加劑或味精，令狗仔更鍾意食或更快食完。」Mandy一語中的地說。但狗仔所需的營養組合，卻跟人類有所不同，「最唔同嘅係人類主要嘅能量來源會喺碳水化合物如飯身上，但蛋白質，或係肉類等反而先係狗仔主要嘅力量來源。」目前店內有五款鮮食磚，每款均有一款主要肉類如豬、牛及魚，再配搭十多款食物如蘋菜及豆類，較「估佢唔到」的有小麥胚芽油、蛋殼粉、豬肝及生蠔，以確保能提供足夠的微量元素。身為產品顧問的Mandy指某些人會認為生蠔含太高碘質，但其實只要份量適中狗仔同樣能食用。

壹週刊 NEXT   /   12-06-2017

採訪：黃綺敏   攝錄：林志謙、關永浩

閱讀全文